12/06/2014

Encontro con Xesús Fraga, o autor de Reo

 
 
  O venres 28 de novembro de 2014 Xesús Fraga, o autor do libro Reo, veu dar una charla ao IES Francisco Aguiar. Os alumnos e alumnas de 2º da ESO esperabamos á porta do salón de actos. O escritor e xornalista chegou. Vestía un abrigo negro e un pantalón marrón. A barba facíao máis vello do que en realidade é, pero dáballe un aspecto máis serio. Na man levaba un paraugas negro. Pareceume un tipo sinxelo, con pouca pinta de escritor. E entón decateime de que xa o tiña visto antes no parque infantil. Sempre me chamou a atención porque lía seguido; sempre estaba esperando cos ollos postos no libro, a maior parte das veces de pé.
   Entramos no salón de actos coma tolos e sentamos por grupos. Nas últimas clases de lingua galega estiveramos falando do libro e tiñamos preparadas preguntas para facerlle a Xesús Fraga.
   O escitor subiu ao escenario e permaneceu todo o tempo de pé. Ninguén se atrevía a romper o xeo. Soe pasar sempre, primeiro ninguén fala e logo falta tempo para preguntar. De súpeto un valente preguntou sobre Lee, o can de Chagui. A esta pregunta seguiron outras referentes ao libro, pero sobre todo sobre a súa faceta de graffiteiro. Falou dos seus amigos graffiteiros e de que coñeceu esta arte en Londres, onde pasaba os veráns na casa da súa avoa. Deu a entender que o graffiti é una maneira de expresión un pouco perigosa. O seu primeiro debuxo fíxoo no antigo edificio que agora alberga os xulgados. Un bo sitio para comezar! Tamén dixo que as autoridades os tiñan controlados porque coñecían o estilo de cada un , polos graffitis permitidos. Do libro, ademais doutros aspectos, comentou o seu final aberto para que cadaquén imaxinase a continuación da historia.
   Pasou a hora sen decatármonos. O timbre colleunos por sorpresa. Foi una pena porque o tempo foi escaso e quedaron moitas preguntas sen facer.
VIOLETA SILVA SÁNCHEZ, 1º D
 
 
O venres tivemos una charla co escritor Xesús Fraga. Ao principio pensei que ía ser a típica charla na que el fala e nós escoitamos aburridos, pero non. Resultou ser divertida, porque non falou el só, fixémoslle preguntas que el nos contestou. Ao principio foi difícil, pois tardamos en preguntar, pero logo todo resultou moito máis fácil.
   O escritor contounos cousas moi interesantese. A min sorprendeume moito unha das súas respostas: díxonos que el aínda tiña amigos que son pais e fan graffitis, porque lles gusta e non porque sexa unha moda; por iso a madurez non implica deixar de practicar esta arte.
   Eu fíxenlle unha pregunta da que me esperaba outra resposta. Pregunteille se os seus país sabían que era un garaffiteiro. Eu supoñía que non, pero contou que practicaba na casa e que incluso, algún dos seus amigos probaba as pinturas nas paredes do seu cuarto.
   Aínda que non tivemos moito tempo, resultou unha hora divertida, e ao fin e ao cabo fóra das aulas e da clase.
 
NURIA GOLPE PEDREIRA 2ºA
 
Xesús Fraga visitounos o 28 de novembro no salón de actos do IES Francisco Aguiar. Esperábamos con moitas ganas, pois tiñamos moitas preguntas que facerlle sobre o seu entretido libro. Despois de que Andrés lera una emotiva biografía, Xesús deu paso ás preguntas. A primeira custou moito, por vergoña, pero o meu amigo Adrián atreveuse. Quería saber sobre o can de Chagui. A Xesús fíxolle ilusión que a primeira pregunta fora sobre Lee, porque é un personaxe importante e aínda ninguén lle preguntara sobre el. A súa contestación foi moi longa , por iso só deu tempo a unhas cantas preguntas. A que máis me gustou tratou sobre o lugar do seu primeiro graffiti, no actual edificio dos xulgados. Contounos todas as transformacións que sufriu ese edificio, e que o seu graffiti foi alí, de verde. Tamén contou que no seu faiado  atoparon sacos de leite en po que trouxeran por causa da posguerra.
   Eu, nos últimos instantes, levantei con ganas a man, pero nada, non deu tempo e quedei coa dúbida do significado do final.
 
JORGE TAÍN ALEMPARTE 2ºD

9/29/2014

Reo de Xesús Fraga

 
Este é o libro escollido para ler  cos alumnos e alumnas de 2º curso da ESO este primeiro trimestre . O autor é veciño noso, Xesús Fraga, e a temática tamén nos resulta próxima, pois vai de grafiteiros e iso, en Betanzos, abunda. Quizais Reo,o personaxe principal,  nos lembre a algún amigo ou incluso a nós mesmos. O que si sabemos é que nos vai caer ben, moi ben.
Eis tedes una entrevista ao autor, publicada en La Voz de Galicia, xornal no que traballa. Nela  fala desta obra, gañadora do premio Raíña Lupa. Estaría ben que tamén viñera falar connosco, non?
Na biblioteca temos xa exemplares dispoñibles.
 Veña, a que esperades? Comezamos a ler XA.   
 
 
 
«O rap é un xénero axeitado para contar a realidade»
 
Un adolescente grafiteiro protagoniza «Reo», a novela coa que o autor gañou o premio Raíña Lupa      Novo libro de Xesús Fraga (Londres, 1971). Trátase de Reo (Galaxia), co que gañou o premio Raíña Lupa de literatura xuvenil, e que protagoniza un grafiteiro de 17 anos.
 
  -¿Por qué escolleu un grafiteiro para esta historia?
  -O graffiti é unha presenza constante nas nosas paisaxes urbanas, pero son moi poucos os que reparan nel, e os que o aprecian, aínda menos. Hai un gran descoñecemento sobre as motivacións dun grafiteiro, e axudar ao lector a descubrilo era unha das miñas intencións coa novela.
 
  -O libro amosa un gran dominio do argot técnico, ¿foi vostede grafiteiro de rapaz?
  -Si, entre os 14 e os 20, máis ou menos, vivín con moita intensidade o graffiti e o seu mundo. Non pintei tanto como me gustaría, pero si que era moi activo coa cámara. Entre as miñas fotos e as que intercambiaba con grafiteiros de todo o mundo conseguín xuntar un álbum ben curioso. No básico o argot non cambiou.
 
  -Reo, o protagonista, quere encher a cidade co seu nome pero seu avó facía carteis de películas para o cine e non os asinaba. ¿E a mostra dun cambio social?
  -A novela tamén propón unha reflexión sobre o que somos, o que queremos ser e como nos ven os demais, a través dos nomes e alcumes que eliximos ou que nos poñen. Escribir o seu nome é a razón de ser dun grafiteiro, o que dá pé a preguntarse sobre a identidade. O avó, en cambio, é un artista anónimo, aínda que aí me interesaba máis recuperar esa artesanía desaparecida dos carteis dos cines antigos.
 
  -Reo non é dos que pintan monumentos, ¿cómo se diferenza?
-No graffiti hai de todo: quen quere ser «malo», quen pinta de xeito indiscriminado e mesmo guerrea cos colegas. Tamén están os que queren desenvolver o seu estilo ou difundir esta arte e prefiren facelo con máis tranquilidade. Para min, o ideal é quen elixe os sitios que pinta tendo en conta o contexto e as súas consecuencias. Reo é consciente da historia da arte e nunca pintaría sobre algo con valor patrimonial.
 
  -O xurado salientou a temática actual e a linguaxe directa, ¿podería chamarse literatura rap?
  -Esta historia acontece agora mesmo, coa crise de fondo, e hai un personaxe que rapea sobre a trama, a modo de resumos. O rap sempre foi un xénero moi axeitado para contar a realidade.
 
  -Cando se presenta Reo e di «un ninguén, vamos», soa ao Balbino de Neira Vilas, ¿non?
  -Si, o comezo é unha homenaxe consciente a Balbino e tamén a Holden Caulfield, de O vixía no centeo.

6/20/2014

A pedra

Habendo boas vendedoras, 
non hai produto malo


Un traballo de Ana Cordal, Lucía Couceiro, 
Mar Nieves e Sonia Platas (4ºA)

1/29/2014

Os nomes da chuvia

                                                                 
 Unha soa palabra, chuvia, non chegaría para poder contar o que pasa estes días. A ligua propia é a que mellor interpreta a realidade circundante. Non é, pois, de estrañar toda esta riqueza léxica.


Condensación de Auga:
- Borraxeira, Borraxoia, Brétema, Cegoña, Fuscallo, Néboa, Neboeiro, Nebra, Zarrazina…
Chuvia Feble:
- Babuña, Babuxa, Barbaña, Barbuza, Barrallo, Barrufa, Barruñeira, Barruzo, Borralla, Breca, Chuvisca, Chuviscada, Chuviñada, Froallo, Lapiñeira, Marmaña, Orballo, Parruma, Parrumada, Patiñeira, Patumeira, Poalla, Poallada, Poalleira, Poallo, Zarzallo…
Chuvia Forte:
- Arroiada, Ballón, Basto, Bátega, Bategada, Cebra, Cebrina, Chaparrada, Chuvascada, Chuvasco, Chuvieira, Cifra, Ciobra, Dioivo, Treixada, Xistra, Zarracina…
Con raios e tronos:
- Treboada, Torboada, Torbón, Trebón…
Con Neve e Xeo:
- Auganeve, Cebrina, Cebrisca, Escarabana, Nevada, Nevarada, Nevareira, Nevarío, Nevisca, Nevarisca, Pedrazo, Salabreada, Sarabiada, Torba…
E logo, cando remata, está a:

- Amizar, Delampar, Escambrar, Escampar, Estear, Estiñar, Estrelampar…

Convocado o XLVI Concurso Literário de Contos de nenos para nenos da A. C. O Facho

1. Poderám participar rapazes e raparigas que pressentem as suas obras em Língua galega. Os trabalhos presenteados deveram ser originais e inéditos em toda a sua extensom.
2. O prazo de admissom de originais finaliza o dia 31 de Março de 2014 às doce da noite.
3. A apresentaçom de originais para o Concurso fará-se por correio postal dirigido à sede da Associaçom Cultural O FACHO. R/ Frederico Tápia, 12-1º 15005. A Corunha. Podendo fazer individualmente ou por médio do centro onde curse os seus estudos.
4. No caso em que sejam os centros escolares os que pressentem os originais ao Concurso, deveram fazer umha pré-selecçom dum máximo de dous trabalhos por categoria, qualquer outro terá que ser apresentado individualmente.
5. As obras haverem de serem relatos originais e nom estarem editados por nengum procedimento impresso ou electrónico, nem terem sido premiados em qualquer outro concurso ou certame literário e em condiçons para que os seus direitos de publicaçom podam ser cedidos à Associaçom Cultural O FACHO por período de cinco anos contados a partir do dia do falho do júri.
6. Para além da originalidade literária, o júri valorizará a riqueza lingüística e o conhecimento gramatical reflectido nas obras.
7. Estabelecem-se duas categorias:
- Categoria A. Nenos e nenas de 6 a 12 anos.
- Categoria B. Rapazes e rapazas de 13 a 16 anos.
8. As quantias dos prémios serám as que seguem:
- Categoria A.
* 1º: 100.- € em efectivo e um lote de livros doados pola Editorial Galáxia.
* 2º: 100.- € em efectivo e um lote de livros doados pola Editorial Galáxia.
- Categoria B.
* 1º: 100.- € em efectivo e um lote de livros doados pola Editorial Galáxia.
* 2º: 100.- € em efectivo e um lote de livros doados pola Editorial Galáxia.
9. Cada autor só poderá apresentar umha obra atendo-se aos seguintes limites de extensom:
- Categoria A. Um máximo de cinco fólios.
- Categoria B. Um máximo de dez fólios.
10. As obras haverám de se apresentar por duplicado, manuscritas ou mecanográficas, encadernadas ou grampadas e levaram por detrás do último folio os seguintes dados:
- Nome e apelidos do autor/a.
- Endereço e telefone. Correio electrónico.
- Centro onde cursa os seus estudos.
- Categoria na que participa.
11. Os prémios serám escolhidos por um júri nomeado pola Associaçom Cultural O Facho em falho que se fará público no mês de Maio.
12. O júri poderá declarar deserto um ou vários dos prémios do concurso e será o que deverá resolver aquelas situaçons que se pressentem e que nom esteiam contempladas nestas bases, assim como as dúvidas na sua interpretaçom.
13. A participaçom neste Concurso implica a aceitaçom das presentes bases.
Correo electrónico: o_facho_a_cultural@yahoo.com.br
A Corunha, 31 de Janeiro 2014

1/26/2014

Chove, chove e chove...



É inevitable, temos que falar da chuvia,  porque mira que chove...En todos os lugares, a todas horas, con quen sexa... sae o tema...porque mira que chove...

Si, xa sabedes que temos moito léxico chuviñento, pero nesta necesidade sociolóxica de comentar este fenómeno meteorolóxico  pode pasar que non atopemos a palabra axeitada, esaa que nos di como foi a chuvia ese día. E é neste contexto de melancolía chuviñenta que nos  chega unha entrada do blogue de Román Landín que fala, como non, da chuvia. Por que mira que chove...
Clicade aquí, non vaia ser que quededes sen palabras.